Friday, November 8, 2013

வித்யாசாகரின் இசைப்பயணம் - 3

பகுதி -1

பகுதி -2

2002ல் தமிழில் வித்யாசாகர் சொற்ப எண்ணிக்கையிலான படங்களுக்கே இசையமைத்திருந்தாலும் மற்ற படங்களின் பாடல்களையெல்லாம் பின்னுக்குத் தள்ளி ரேஸில் முந்தியது இவரின் ரன் பட பாடல்களே.  ’காதல் பிசாசே’, ’இச்சுத்தா இச்சுத்தா’,’தேரடி வீதியில்’ என துள்ளலான பாடல்களால் ஒரு பக்கம் இளைஞர்களை  குறிவைத்துத் தாக்கியும், ’பொய் சொல்லக் கூடாது காதலி’, ’மின்சாரம் என் மீது’, ’பனிக்காற்றே பனிக்காற்றே’ என மெலடி விரும்பிகளையும் கிளீன் போல்டாக்கி இசை ஜாலம் செய்திருந்தார். இப்படத்தின் வெற்றியானது அவரை தமிழ்த்திரையிசை உலகின் முன்னணி இசையமைப்பாளர்கள் வரிசையில் அமரவைத்தது என்றால் மிகையில்லை. இதே வருடத்தில் வெளியான வில்லன் படத்திலும் சிறப்பான பங்களிப்பைச் செய்திருந்தார்.

2003-லிருந்து 2008 வரை வித்யாசாகர் தமிழ்த் திரையுலகில் தவிர்க்க முடியாத இசையமைப்பாளராய் இருந்தார்.இந்த பிரியடில் மெலடிகளிலும் சரி குத்துப் பாடல்களிலும் சரி தனக்கென தனிப் பாணியில் பிரமாதப்படுத்தினார். இளையராஜாவின் ’கண்ணாலே காதல் கவிதை’,’சுந்தரி கண்ணால் ஒரு சேதி’,’மழைவருது மழை வருது’,’ஓ பட்டர்ஃப்ளை’, ’கல்யாண தேனிலா’ மாதிரியான அதிராத இசையில் மந்த மாருதமாய் வருடும் காதல் டூயட்களை வித்தியாசாகர் இந்த காலகட்டத்தில் தொடர்ச்சியாய் கொடுத்துக்கொண்டிருந்தார். அவற்றில் குறிப்பிட்டு சொல்லும்படியான பாடல்கள் ‘பூ வாசம் புறப்படும் பெண்ணே’, ’கண்டேன் கண்டேன் எதிர்காலம் நான் கண்டேன்’,’டிங் டாங் கோயில் மணி’,’விழியும் விழியும் நெருங்கும் பொழுது’, ’சொல்லித்தரவா சொல்லித்தரவா’,' கொஞ்ச நேரம் கொஞ்ச நேரம்’ ஆகியவற்றைச் சொல்லலாம். ‘அழகூரில் பூத்தவளே’,’ஆசை ஆசை இப்பொழுது’ போன்ற பாடல்கள் சூதிங் மெலடிகள்தான் என்றாலும் என்னளவில் அவற்றிற்கு வேறொரு பட்டியல் கொடுப்பேன்.

‘இந்தாடி கப்பங்கிழங்கே’,’மச்சான் பேரு மதுர’,’எலந்த பழம் எலந்த பழம்’,’அப்படி போடு’ என குத்துப் பாடல்களானாலும் ,’இத்தனூண்டு முத்தத்திலே’,’பலானது பலானது’ போன்ற வெஸ்டன் டைப் ஃபாஸ்ட் பீட் பாடல்களானாலும் இவரின் பாணி  மெலடி விரும்பிகளையும் தாளம் போட வைக்கும் வகையில் இருக்கும். மதுர படத்தின் பாடல்களைக் குறிப்பிடும் போது ’பம்பரக் கண்ணு  பச்ச மொளகா ‘ பாடலின் நினைவினூடாக எட்டிப் பார்க்கும் இன்னொரு விஷயம் வித்யாசாகர் - மதுபாலகிருஷ்ணன் கூட்டணி எப்படி மேஜிக் கிரியேட் பண்ணுமோ அதே போல ’கோயமுத்தூர் மாப்பிள்ளைக்கு பொண்ணு கெடச்சா’, ’பதினெட்டு வயசில் என்ன பிடிக்கும்’, ’எல மச்சி மச்சி’, ’காதல் பிசாசே’ என உதித்தின் உச்சரிப்பு பர்வாயில்லைன்னு கூட சொல்லமுடியாதபடி கொத்தி குதறுவதாய் இருந்தாலும்  அவரின் குரல் வித்யாசாகரின் இசையில் சற்றே குறும்பு கொப்பளிக்க கூடுதல் ஸ்பெஷலாய்த் தெரியும்.

எந்த இசையமைப்பாளரை எடுத்துக்கொண்டாலும் அவர்களின் பீக் டைம் பாடல்களில் ஒரே மாதிரியான ட்யூனை ஒன்றுக்கு மேற்பட்ட பாடல்களில் கேட்க முடியும். இதற்கு ராஜா தொடங்கி யுவன் வரை  உதாரணங்கள் சொல்ல முடியும். வித்தியாசாகரும் அதற்கு விதி விலக்கல்ல. உதாரணத்திற்கு அவரின் பீக் டைமான இந்த காலகட்டத்தில் வந்த திருமலை படத்தின் ’வாடியம்மா ஜெக்கம்மா’வை மஜாவின் ’அய்யாறெட்டு நாத்து கட்டோடு’ம், ’அற்றைத் திங்கள் வானிடம்’ பாடலை ’ஒரு கிளி ஆசையில் ஒரு கிளி காதலில்’ பாடலோடும் பொருத்திப் பார்க்கலாம்.இம்மாதிரி நடப்பது அவர்களை அறியாமல்கூட நிகழலாம், ஆனால் அவரின் முதல் படமான பூமணத்தில் பிரபலமாகாமல் போன ’என் அன்பே என் நெஞ்சில்’ எனத் தொடங்கும் பாடலை, தெரிந்தே மீண்டும் சரியான நேரத்தில் பார்த்திபன் கனவு படத்தில் ’பக் பக் பக் மாடப்புறா’ வாக மாற்றி ஹிட்டாக்கிய வித்தைக்காரர் வித்யாசாகர். ’கண்ணாடி கூடும் கூட்டி’(மைனாவே மைனாவே), 'வாக்கிங் இன் தி மூன் லைட்’ (கண்ணால் பேசும் பூவே) போன்ற ஏற்கனவே மலையாளத்தில் தான் ஹிட்டாக்கிய ட்யூன்களை தமிழில் ரீயூஸ் செய்துகொண்டதும்கூட இந்த பிஸி பீரியடில் நிகழ்ந்தது. அன்பு படத்தின் ’தவமின்றி கிடைத்த வரமே’ பாடல் ராஜாவின் ‘தூரத்தில் நான் கண்ட உன் முகம்’ பாடலை நினைவு படுத்துவதாய் தோன்றுவதும் இங்கே நினைவிற்கு வருகிறது.

தமிழ்த் திரைப்பட இசையமைப்பாளர்கள், விருதுகளுக்கு நிகரான அங்கீகாரமாய் நினைக்கும் ரஜினி பட வாய்ப்பை, சந்திரமுகி மூலம் பெற்று தேவா ஆரம்பித்து வைத்து, பின்னர் ரஹ்மானாலும் தொடரப்பட்ட ரஜினிக்கு மட்டுமே செட் ஆகும் டிபிகல் ரஜினி பட ஓப்பனிங் பாடலை வித்யாசாகரால் ஃபுல்ஃபில் பண்ண முடியமா? என்கிற  பலரின் சந்தேகத்தை ’தேவுடா  தேவுடா ஏழுமல தேவுடா’,’அண்ணனோட பாட்டு’ என ஆர்ப்பரித்து, பாடல் ரிலீஸான அன்றே அடித்து நொறுக்கியது தொடங்கி அவரின் மியூசிக் கேரியரில் மகுடமாய் திகழும் ராதாமோகனின் மொழி படத்தின் ‘காற்றின் மொழி’ வரை பிரமாதப்படுத்தியது இதே டைமில்தான்.

’கனா கண்டேனடி’,’நீயா பேசியது’,’சில்லென்ற தீப்பொறி ஒன்று’,’யாரோ ஒருத்தி என்றவளை’, ’மூளையைத் திருகும் மூச்சுக் குழல் அடைக்கும்’, ’காதல் வந்தால் சொல்லி அனுப்பு’,’பிஞ்சு மழைச் சாரல்’,’கண்டேன் கண்டேன் கண்டேன் காதலை’, ’மழை நின்ற பின்னும்’, ’கண்டுபிடித்தேன் கண்டுபிடித்தேன் கன்னித் தீவை கண்டுபிடித்தேன்’ , ’சும்மா கெடந்த சிட்டுக் குருவிக்கு’ , ’சுடும் நிலவு ‘ என  தனித் தனியாய் சிலாகிக்க வேண்டிய நிறைய பாடல்களை தொடர்ச்சியாய் கொடுத்தவர் , 2008ற்குப் பிறகு காவலன் படத்தின் ‘யாரது யாரது’, தம்பி வெட்டோத்தி சுந்தரம் படத்தின் ‘கொலகாரி உன்ன  பார்த்து ’ போன்ற ஒரு சில பாடல்களைத் தவிர்த்து ரசிகர்களை பெரிதாய் திருப்திப்படுத்தினார்  என்று சொல்ல முடியாது. தமிழில்தான் இப்படியேத் தவிர மலையாளத்தில் செம ஃபார்மில் இருக்கிறார் இந்த மெலடி கிங். 

மாநில விருதுகள் தொடங்கி தேசிய விருது வரை பல விருதுகளை அள்ளியிருக்கும் வித்யாசாகரை, கர்னாடிக் மியூஸிக் தொடங்கி நாட்டுப்புற பாடல்கள் வரை நம் பாரம்பரிய இசைகளுக்கு அதிக முக்கியத்துவம் கொடுக்கும் விதத்தில் இளையராஜாவின் இசை வாரிசாய் என்னளவில் பார்க்கிறேன். 

மலையாள படமான ஆர்டினரி தமிழில் ஜன்னலோரமாய் கரு.பழனியப்பன் - வித்யாசாகர் கூட்டணியில் வரவிருக்கிறது. இக்கூட்டணியின் மேஜிக் மீண்டும் ஒர்க் அவுட் ஆகுமா என்று பொருத்திருந்து பார்க்கலாம்.

(நிறைவு)

Wednesday, October 30, 2013

வித்யாசாகரின் இசைப் பயணம் -2

முதல் பாகம்:இங்கே

1997 ல் வெளியான புதையல் படத்திலும் கவனிக்க தக்க வகையிலேயே இசையமைத்திருந்தார் வித்யாசாகர். எண்பதுகளில் ராஜாவின் பாடல்களில் ஜென்ஸியின் குரலை எப்படி மறக்க இயலாதோ அதே போன்றே ’மஞ்சள் வெயில் மாலையிட்ட பூவே’,’பூங்கதவே தாழ் திறவாய்’,’ஆனந்த ராகம்’ போன்ற சில பாடல்களின் மூலம் உமாரமணனின் குரலையும் மறக்க இயலாது. ராஜாவைத் தவிர மற்ற இசையமைப்பாளர்கள் இவரின் குரலை பெரிதாய் பயன்படுத்தியதில்லை என்பது ஒரு இசை ரசிகனாய் எனக்குள்ள வருத்தம். 90களின் ஆரம்பத்தில்  மிக சொற்ப எண்ணிக்கையிலான பாடல்கள் பாடியதுடன் காணாமல் போனவரை, ஒரு நீண்ட இடைவெளிக்குப் பிறகு வித்யாசாகர்தான் புதையல் படத்தின் ‘பூத்திருக்கும் வனமே மனமே’ பாடலில் மூலம் அழைத்து வந்தார். இதே படத்தின் மற்ற பாடல்களான ’ஒச்சம்மா ஒச்சம்மா’, ‘தீம் தக்கு தக்கு தீம்’ ஆகியவை நல்ல பாடல்களாய் இருந்தும் படத்தின் தோல்வியால் பெரிதாய் கவனிக்கபடாமலேயே போய்விட்டன. அதே வருடத்தில் சங்கவியை மூலதனமாக வைத்து வெளியான ’ஆஹா என்ன பொருத்தம்’ சுமாராய் ஓடினாலும் அதில் இடம்பெற்ற ‘சிந்தாமணி சிந்தாமணி’ பாடல் சூப்பர் ஹிட்டாய் அமைந்தது.

ஆர்.கே.செல்வமணியின் சூப்பர் டூப்பர் ஹிட்டான மக்களாட்சிக்குப் பிறகு மீண்டும் மம்முட்டியை வைத்து இயக்கி பெரிய தோல்வி படமாய் அமைந்த அரசியல் திரைப்படம் இதே வருடத்தில்தான் வெளிவந்தது. இப்படம் இன்னமும்கூட நினைவில் இருக்கிறதென்றால் வித்யாசாகரின் இசையன்றி வேறொன்றும் இல்லை. சுபா முத்கலின் கணீர் குரலில் ஆலாபனையோடு ஆரம்பிக்கும் ’ஆஜோரே ஆஜோரே’ வோடுதான் இப்படம் ரிலீசான நாட்களில் எங்கள் காலைகள் விடிந்தன. அந்த அளவிற்கு இலங்கை வானோலியில் இப்பாடல்தான் சுப்ரபாதம் போல ஒலித்துக்கொண்டே இருக்கும். ஹரிஷ் ராகவேந்திராவின் முதல் பாடலான ’வாசகி வாசகி’யும் இப்படத்தில் மற்றொரு மறக்க முடியாத மெலடி.

1998-ல் வித்யாசாகர் இசையமைப்பில் வெளிவந்த சொற்ப எண்ணிக்கையிலான படங்களும் சூப்பர் ஹிட் பாடல்களைக் கொண்ட சூர மொக்கைப் படங்களாகவே அமைந்தன. லவ் டுடே படத்தின் வெற்றி ஜோடியான விஜய் -சுவலட்சுமி நடிப்பில் மிகுந்த எதிர்பார்ப்பில் வந்து கடுப்படித்த ’நிலாவே வா’வில் ஒவ்வொரு பாடலும் அசத்தல் ரகம். எல்லாவற்றிற்கும் மேலாக வைரமுத்துவின் நீ காற்று நான் மரம் என்ற கவிதைக்கு அமைத்த மெட்டு பொற்கிரீடத்தில் வைரமாய் மின்னியது.’மலரே மௌனமா’விற்குப் பிறகு தர்பாரி கானடா ராகத்தில் பல பாடல்கள் வித்யாசாகர் இசையில் வெளிவந்திருக்கின்றன. இப்பாடலும் அதற்கு உதாரணம்.

’பூவுக்கெல்லாம் சிறகு முளைத்தது’ என்று ஸ்ரீனிவாஸின் குரலில் கேட்கும் தோறும் நமக்கும் சிறகு முளைக்கும் உணர்வை கடத்தியதும் இதே ஆண்டில்தான்.இப்பாடல் மட்டுமன்றி உயிரோடு உயிராக மொத்த ஆல்பமுமே ரசனையான பாடல்களைக் கொண்டிருக்கும். இவ்வருடத்தின் மற்றொரு மறக்க இயலா மெலடி தாயின் மணிக்கொடி படத்தின்’நூறாண்டிற்கு ஒரு முறை பூக்கின்ற பூவல்லவா’.

1999 ல் வெளியான எதிரும் புதிரும் இயக்குனர் தரணியின் முதல் படம். திருட்டு வி.சி.டியில் வெளியாகி சக்கை போடு போட்டு அடங்கியபின், பொறுமையாக ரிலிசான படம்.இப்படத்தில் புஸ்பவனம் குப்புசாமி பாடிய ‘தொட்டு தொட்டு பேசும் சுல்தானா’ மற்றும் ‘காத்து பொச பொசக்க’ பாடல்களின் வெற்றி பின்பு இப்படியான நாட்டுப் புற மெட்டுகள் வித்யாசாகரின் இசையில் நிறைய வெளிவருவதற்கு காரணமாய் அமைந்தது. இதே ஆண்டில் வெளியான ‘பூப்பறிக்க வருகிறோம்’ படத்தின் ’எட்டில் அழகு பதினெட்டில் அழகு’ பாடல் ஸ்ரீனிவாஸ் குரலில் சூப்பர் ஹிட் பாடலாய் வித்யாசகருக்கு அமைந்தது.

2000 ஆண்டிற்குப் பிறகுதான் தமிழில் வித்யாசாகரின் மேஜிக் ஒர்க் அவுட்டாக ஆரம்பித்தது எனலாம். சினேகிதியே ஆவரேஜ் கலக்‌ஷன் என்றாலும் அப்படத்தின் ‘ராதை மனதில்’ அரங்கேறாத கல்விக்கூட மேடைகள் இல்லை எனலாம்.

2001ல் வெளியான தில் படத்தில் ‘உன் சமையலறையில்’, ’கண்ணுக்குள்ள கெளுத்தி’,’மச்சான் மீச’ என்று அதகளமாய் ஆரம்பித்தவர், அதே ஆண்டில் வெளியான அள்ளிதந்த வானத்திலும் ’வாடி வாடி நாட்டுக்கட்டை’, ’கண்ணாலே மிய்யா மிய்யா’,’தோம் தோம் தித்தித்தோம்’அந்திக் கருக்கையில’ என ஜானருக்கொன்றாய் ஜூகல் பந்தி வைத்தார்.இவ்வாண்டில் மற்ற ஹிட் பாடல்கள் தவசி படத்தின் ’தந்தன தந்தன தை மாசம்’ மற்றும் மலையாளத்தில் ’சம்மர் இன் பெத்லேகம்’ படத்திற்காய் போட்டு இன்றளவும் மலையாள மியூசிக சேனல்களில் கலக்கிக்கொண்டிருக்கும் ’ஒரு ராத்ரி கூடி விடவாங்கவே’வை மலைக்காற்றாய் மாற்றி தமிழ் பேச வைத்த அர்ஜுனின் வேதம் பட பாடல். இதே ஆண்டின் பூவெல்லாம் உன் வாசம் வித்யாசாகருக்கு சூப்பர் டூப்பர் ஹிட் ஆல்பமாக அமைந்தது. குறிப்பாய் சொர்ணலதா பாடிய ‘திருமண மலர்கள்’ மற்றும்,கருத்தம்மாவின் ’போறாளே பொன்னுத்தாயி’ ஆகிய பாடல்களில் பிறந்த இடமே புகுந்த வீடாக மாறுதே என்கிற சந்தோஷ அலுப்பை ஒன்றிலும்,மற்றொன்றில் பிறந்த வீட்டை பிரிந்து செல்கிற உச்ச பட்ச சோகத்தையும் சொர்ணலதா வெளிப்படுத்தும் விதத்தை ஒப்பிட்டு ரசித்திருக்கிறேன்.

2002ல் ரன்னில் பிடித்த ஓட்டம் எப்படி சந்திரமுகி வரை ஸ்டெடியாக போனது எனபது அடுத்த இடுகையில்.

Saturday, October 26, 2013

இசையமைப்பாளர் வித்யாசாகரின் இசைப் பயணம்

எண்பதுகளின் இறுதியிலேயே இசையமைப்பாளராக அறிமுகம் எனினும், 1994-ல் வெளிவந்த அர்ஜுனின் ஜெய்ஹிந்த் படத்தின் மூலமே தமிழ் இசை ரசிகர்களிடம் அறிமுகமானார் என்றால் மிகையில்லை. ’முத்தம் தர ஏத்த இடம் ஹோய் ஹோய்’,’கண்ணா எஞ்சேலக்குள்ள’,’போதை ஏறிப் போச்சு” என்று படத்தின் அத்தனை பாடல்களும் அதிரி புதிரி ஹிட்.இவற்றில் சில பாடல்கள் பஞ்சாபி ஆல்பம் ஒன்றிலிருந்து உருவப்பட்டவை என்பது பின்னர் தெரிய வந்தாலும், அக்காலக் கட்டத்தில் இந்த ஆராய்ச்சிக்கெல்லாம் இடமின்றி பட்டி தொட்டியெங்கும் பட்டையை கிளப்பிய இப்பாடல்கள் வித்தியாசாகருக்கு தமிழில் விசிட்டிங் கார்ட் படமாய் அமைந்தது.

ஜெய்ஹிந்த் பாடல்கள் மிகப்பெரிய ஹிட் அடித்தும் அடுத்து தமிழில் வேறு படங்கள் இவரின் இசையில் அந்த வருடத்தில் வரவில்லை. அப்போது வித்யாசாகர் தெலுங்கில் பிஸியாக இருந்தது காரணமா, இல்லை இயக்குனர்களின் தேர்வாய் அவர் இல்லையா என்பதும் தெரியவில்லை. 1995ல் மீண்டும் அர்ஜுனின் மூலமே ’மலரே மௌனமா’ என்று மயிலிறகால் வருடியும்,’ஏய் சப்பா ஏசப்பா’ என புயலாய் சீறியும் கர்ணாவில் எண்ட்ரியானர் . கர்ணா வெளியான அதே நாளில்தான் பாரதிராஜாவின் பசும்பொன்னும் வெளியானது. தஞ்சையின் சாந்தி - கமலா காம்ளக்ஸில் சாந்தியில் பசும்பொன்னும்,கமலாவில் கர்ணாவும் ரிலீஸாகியிருந்தன. ஜெண்ட்டிமேன், ஜெய்ஹிந்த் என்று தொடர் பிளாக் பஸ்ட்டர்களுக்குப் பின்னர் அர்ஜூனின் ஹாட்ரிக் முயற்சி என்பதாலும்,படத்தின் மொத்த பாடல்களும் ஏற்கனெவே ஏக பிரபலமாகியிருந்ததாலும், ரிலீஸான அன்று கமலா தியேட்டரில் ஏகப்பட்ட கூட்டம். கண்டிப்பாக டிக்கெட் கிடைக்காது என்று புரிந்ததும், கிழக்குச் சீமையில மூலம் மீண்டும் ஃபார்மிற்கு வந்து, கருத்தம்மா என்ற ஆவரேஜ் படத்தையும் கொடுத்து கொஞ்சம் எதிர்பார்ப்பை கிளப்பியிருந்ததால், சரி பசும்பொன்னிற்குப் போகலாம் என்று டிக்கெட் வாங்கி உள்ளே சென்றால்,பசும்பொன் பெட்டி வரவில்லை என்று அங்கேயும் கர்ணாவை ஓட்டினார்கள்.படம் சுமார் எனினும் பாடல்களால் கொடுத்த காசுக்கு நியாயம் செய்து அனுப்பி வைத்தார் வித்யாசாகர்.

இடைவேளையின் போது வந்த பசும்பொன் ட்ரைலரைப் பார்த்தால், பாரதிராஜாவின் முந்தைய இரு படங்களின் பாடல்களான ’ஆத்தங்கர மரமே’, ’போறாளே பொன்னுத்தாயி போகிற போக்கில் மனசத் தொட்டு’ என்று ஏ.ஆர்.ரஹ்மானின் சூப்பர் ஹிட் ட்யூன்களுக்கு சற்றும் சளைத்ததில்லை என்கிற மாதிரி,’தாமர பூவுக்கும் தண்ணிக்கும்’ என்று மண் மணக்க வித்யாசாகர் விளையாண்டியிருந்தார். அதே வருடத்தில்தான் சுந்தர்.சி யின் முறை மாமனில் ’ஆனந்தம் ஆனந்தம் ஆனந்தம் வந்ததே’ என்று கிளாசிக்கல் ஹிட்டையும் கொடுத்திருந்தார். வில்லாதி வில்லன்,ஆயுத பூஜை என தொடர் ஹிட்களால் அந்த ஆண்டில் பரவலாக எல்லா தரப்பு இசை ரசிகர்களிடமும் சென்றடைந்தார் வித்யாசாகர். அந்த வகையில் 1995 அவரின் மியூசிக்கல் கேரியரில் மறக்க முடியாத ஆண்டாக இருக்கும்.

’ஒரு தேதி பார்த்தா தென்றல் வீசும்’,’கோயமுத்தூர் மாப்பிள்ளைக்கு பொண்ணு கெடச்சா’ என்று 1996 ம் ஆண்டின் தொடக்கத்திலேயே ஹிட் அடித்து இசைப்பயணத்தைத் தொடர்ந்தவர், ’பாடு பாடு பாரத பண்பாடு’,’உச்சி முதல் பாதம் வரை’ என தனக்கு தொடர் ஆதரவு தரும் அர்ஜுனின் செங்கோட்டையிலும் இசைக் கொடியை நாட்டினார். எனினும் படத்தின் தோல்வியால் வீழல் நீராய் ஆகின அத்தனை பாடல்களும்.

அதன் பிறகு இசையமைத்த ஓரிரு படங்களும் தொடர் தோல்வியினை சந்தித்திருந்த வேளையில் அட்டகாசமான விளம்பரங்கள்,அற்புதமான பாடல்கள்,அம்சமான ஹிரோயின் என ஏகப்பட்ட எதிர்பார்ப்புகளோடு வெளிவந்தது ப்ரியம். பம்பாயின் ’உயிரே உயிரே’ மூலம் தமிழ் இசை ரசிகர்களை ஒட்டு மொத்தமாய் அச்சமயத்தில் தன் குரலால் வசியப் படுத்தி வைத்திருந்த ஹரிஹரன் மற்றும் சித்ராவின் காம்பினேஷனில், இதுவரைக்குமான வித்யாசாகரின் மெலடிகளிலேயே தி பெஸ்ட் என நான் நினைக்கும் ‘உடையாத வெண்ணிலா’ என்ற மெஸ்மரைஸிங் மெலடி தொடங்கி,அன்றைய கல்லூரி மாணவர்களின் கல்சுரல்சுக்கான நடனத் தேர்விற்கு முதல் விருப்பமாய் இருந்த ’தில்ருபா’வரை ஒவ்வொரு பாடலையும் ரசனையோடு செதுக்கியிருந்தார் வித்யாசாகர். சொதப்பலான திரைக்கதையால் படம் வெளிவந்த வேகத்திலேயே பாதாளத்திற்குள் விழுந்தும் பாடல்களின் வெற்றியை அது எவ்வகையிலும் பாதிக்கவில்லை என்று சொல்லும் அளவிற்கு கேசட் விற்பனையில் சாதனை படைத்தது.

இரண்டாம் பகுதி:


மூன்றாம் பகுதி:

Friday, July 19, 2013

நிரந்தரம் நிறைந்தவன் வாலி

நம் அன்றாடங்களின் ஒரு சில மணித்துளிகளையாவது அனுதினம் களவாடிக்கொண்டே இருக்கும் இயல்பு, அவரவர் பதின்மத்தின் நினைவுகளுக்கு உண்டு இல்லையா,அந்த வகையில் என்னின் இன்றைய பொழுதுகளை களவாடுவதில் 90களில் வெளிவந்த திரைப்படங்களுக்கும், பாடல்களுக்கும் மிகப் பெரிய பங்கு உண்டு, அதில் நிறைய பாடலாசிரியர் வாலி அவர்களுக்கும்.

இசைப் பிரியம் என்பது இயல்பாய் என்னுள் பால்யத்திலிருந்தே தொடர்ந்திருந்தாலும், ஒரு பாடலை அதன் வரிகளோடு சிலாகித்து ரசிக்க ஆரம்பித்தது எப்போதாய் இருக்கும் என்ற யோசனை, எனது பதின்மத்தின் தொடக்கத்தில் வெளிவந்த கோபுர வாசலிலே படத்தின் ’தேவதை போலொரு பெண்ணிங்கு’ பாடலில் முட்டி நிற்கிறது.

”சீதாவை பிரித்தது மான்தான் புள்ளி மான்தான்
தோதாகச் சேர்த்தது மான்தான் அனுமான்தான்”

என்ற இந்த வார்த்தை விளையாட்டின் மூலமாகத்தான் நான் வாலியை ரசிக்க ஆரம்பித்திருக்கிறேன் என்று நினைக்கிறேன்.

60 களின் தொடக்கத்திலிருந்து தத்துவம் தொடங்கி காதல் வரை அவரின் வரிகளில் உச்சம் தொடாத உணர்வுகளே இல்லை என்பது மறுக்க முடியாது. ஆனாலும் எனக்கு மனதிற்கு மிக நெருக்கமாக உணரும் பாடல்கள் அனைத்தும் எண்பதுகளின் இறுதியிலோ தொண்ணூறுகளின் தொடக்கத்திலேயோ வெளிவந்த பாடல்களாகவே இருப்பதால் அந்த நெருக்கத்திற்குள் வாலியின் வார்த்தைகளுக்கு வசப்பட்டதின் சிலாகிப்பு மட்டுமே இங்கே.

”நாளை என்னும் நாளை எண்ணி என்ன கவலை
நல்லபடி வாழ்ந்தால் என்ன இந்தப் பொழுதை”

எங்க தம்பி படத்தின் ’உச்சிமல காட்டக் கேளு’ பாட்டின் இந்த வரிகள்தான் ரசிகனாய் இருந்த என்னை அவரின் வரிகளின்பால் பைத்தியமாக்கியது எனலாம். எளிமையான வரிகள்தான் என்றாலும் ஏனோ இவ்வரிகளில் ஒரு மயக்கம் இன்றுவரை தொடர்கிறது.

”ஆகாய வெண்ணிலாவே”, ”வராது வந்த நாயகன்” போன்ற பாடல்களை கேட்கும்தோறும் அந்த சொற் பிரயோகம்(சொற்பிரயோகம் என்பதைவிட சொற்பிரவாகம் என்பதுதான் சரியாய் இருக்கும்) கண்டு ”எங்கிருந்துடா இந்த ஆளு இந்த சொற்களை புடிக்கிறாரு” என்று மயிர் கூச்செறிய  வியந்திருக்கிறேன்.

”சுற்றிலும் மூங்கில் காடுகள்
தென்றலும் தூங்கும் வீடுகள்”

என்று வண்ண வண்ணப் பூக்கள் படத்தின் இள நெஞ்சே வா பாடலில், காற்றுப் புக முடியாத அடர்த்தியான மூங்கில் காடுகளை, தென்றலும் தூங்கும் வீடுகளாய் கற்பனையைக் கொட்டி குவித்து, சிந்தனை தேர் ஏறி கம்பனை அல்லவா வம்பிக்கிழுந்திருப்பார் இந்த பாடல் முழுவதும்.

”விலை மீது விலை வைத்து 
கேட்டாலும் கொடுத்தாலும் 
கடைதன்னில் தாயன்பு கிடைக்காதம்மா”

”காலையில் தினமும் கண்விழித்தால் நான் கைதொழும் தேவதை அம்மா”

அம்மாவைப் பற்றி நினைக்கையில், கூடவே வாலியின் இந்த வரிகளும் சேர்ந்து கொண்டல்லவா அவளை இன்னும் பெரிதாய் வணங்கச் சொல்கிறது.

”நட்பைக்கூட கற்பைப் போல எண்ணுவேன்”,”மூழ்காத ஷிப்பே ஃப்ரெண்ட்ஷிப்தான்” என்று  நட்பின் சிறப்பை இவ்வளவு சொற்ப வார்த்தைக்குள் பெரிதாய் விளக்க வாலியை விட்டால் வேறு யாரால் முடியும்.

மற்ற எந்த உணர்வையும்விட வாலியின் காதல் வரிகளை அவ்வளவு காதலித்திருக்கிறேன். 

"கையேந்தும் ஆட்டுக்குட்டி கன்னிப் பெண்ணா மாறாதோ
மையேந்தும் கண்ணக் காட்டி மையல் தீரப் பேசாதோ"

”உனக்கென மணிவாசல் போலே மனதைத் திறந்தேன்
மனதிற்குள் சிறு ஊஞ்சலாடி உலகை மறந்தேன்” 

“இடது விழியில் தூசி விழுந்தால்
வலது விழியும் கலங்கிவிடுமே
இருட்டில்கூட இருக்கும் நிழல் நான்
இறுதி வரைக்கும் தொடர்ந்து வருவேன்”

”உன்னாலே உண்டாகும் ஞாபகங்கள் ஒன்றிரண்டு அல்லவே
ஒன்றுக்குள் ஒன்றான நீரலைகள் என்றும் இரண்டல்லவே”

என்று மயிலிறகால் வருடினாலும்,

”ஜீவன் ரெண்டும் சேர்ந்தது தேவன் வகுத்த சாசனம்
காதல் எந்த நாளிலும் கவிதை போல சாஸ்வதம்”

“காளிதாசன் ஏடுகள் கண்ணன் ராசலீலைகள்
பருவமோகம் தந்தது பாவம் அல்லவே
ஷாஜகானின் காதலி தாஜ்மஹால் பூங்கிளி
பாசம் வைத்த பாவம்தான் சாவும் வந்தது
இறந்தாலே இறவாது விளைகின்ற பிரேமையே”

என்று சோக ரசம் தோய்த்துக் கொடுத்தாலும், அந்தக் காதலே சொக்கிப் போகிற மாதிரியல்லவா எழுதி குவித்திருக்கிறார்.

எப்போதும் ஏதேனும் பாடலை முணுமுணுத்தபடியே இருப்பது என்பது எனது இயல்பென்றாகிவிட்டது. வீட்டில் சொல்லுவார்கள் "இப்படி வீட்டுக்குள்ளேயே பாடிகிட்டு இருக்கதுக்கு , முறையா கத்துகிட்டு எதாவது போட்டி கீட்டினு போயி பாட வேண்டியதுதானே” என்று. அவர்களுக்கு பதில் சொல்ல,

“அறையில் பாட்டெடுப்பேன் 
அரங்கம் தேவையில்லை
சபையில் பேரெடுக்க 
குயில்கள் இசைப்பதில்லை
எனக்கே நான் சுகம் சேர்க்க 
தினமும் பாடுகிறேன்”.

என்ற வாலியின் ’வானமழை போலே’ பாடலின் வரிகளைத்தான் கடன் வாங்கியிருக்கேன்.

”மலர்கள் தோறும் நடந்து போகும் சிறிய ஜீவனே
உந்தன் மனதை கொஞ்சம் இரவல் கேட்கும் எனது ஜீவனே” 

மீரா படத்திற்காக எழுதிய இவ்வரிகளில்,பட்டர்ஃப்ளையிடம் மனதை இரவல் கேட்கும் அந்த குழந்தை மனதை, கொஞ்ச நேரமேனும் இரவல் கொடுக்க மாட்டாரா வாலி என்று ஏங்கியிருக்கின்றேன்.அதே பாடலில் “எனக்கும் கூட அடிமை கோலம் பிடிப்பதில்லையே” என்று எழுதி அவரின் வரிகளுக்கு நம்மை அடிமையாக்கியது முரண்.

”தூங்காத விழிகள் ரெண்டு” மற்றும் “மன்றம் வந்தத் தென்றலுக்கு” பாடல்களில்,

”மாமர இலை மேலே மார்கழி பனி போலே
பூகள் மடி மீது நான் தூங்கவோ” 

“தாமரை மேலே நீர்த்துளி போல்
தலைவனும் தலைவியும் வாழ்வதென்ன” 

என்ற வரிகளில் கூடலுக்கும்,ஊடலுக்கும் அவர் பயன்படுத்தியிருக்கும் அந்த உவமைகளை ஒப்பிட்டு ரசித்திருக்கிறேன்.

வாலி அதிவிரசமாய் எழுதியதாய் சொல்லப்பட்ட, இந்து பட பாடல்கள்தான் எங்களின் விடலை பருவத்தின் தேசியகீதங்களாய் இருந்தன.கொஞ்சம் மெச்சூர்ட் ஆன பிறகு, 

“ஆலிலை சிவப்பாக அங்கமும் நெருப்பாக
நூலிடை கொதிப்பேறும் நிலை என்னவோ”

“காலம் என்ற தேரே ஆடிடாமல் நில்லு 
இக்கணத்தைப் போலே இன்பமேது சொல்லு”

என்று காமத்தை அழகியலோடு ரசிக்கவும் அவரின் வரிகளே தலைவாசலைத் திறந்தன.

தலைவனை பிரிந்த தலைவியின் விரகதாப உணர்வை கண்ணதாசனின் பல பாடல்களில் ரசித்திருக்கிறேன். 

“எப்பொழுதும் உன் சொப்பனங்கள்
முப்பொழுதும் உன் கற்பனைகள்
சிந்தனையில் நம் சங்கமங்கள்
ஒன்றிரண்டா என் சஞ்சலங்கள்”

“ஏகாந்த நினைவும் எரிகின்ற நிலவும்
என் மேல் ஒரு போர் தொடுக்க”

என்று வாலியும் அதில் குறை வைக்கவில்லை.

தாங்கள் எழுதிய வரிகளையோ அல்லது அதை ஒத்த சிந்தனையையோ பாடலாசிரியர்கள் மீண்டும் மீண்டும் வேறு வடிவங்களில் கொடுத்திருப்பதை தமிழ் திரைப்பாடல்களில் நிறைய கவனிக்கலாம். வாலியும் அப்படி எழுதியிருக்கிறார். உதாரணத்திற்குச் சொல்ல வேண்டுமென்றால்,

”ஒரு காதல் கடிதம் விழி போடும்” என்று சத்யாவின் வலையோசை பாடலில் எழுதியதை, ஓ பட்டர் ஃப்ளையில் “விழிகள் நூறு கடிதம் போட்டும் பதில்கள் இல்லையே” என்றும்,

”உன்னை காணாதுருகும் நொடி நேரம் 
பல மாதம் வருடம் என மாறும்” 

என்று சத்யாவின் வலையோசையில் வெளிப்பட்ட இந்த சிந்தனைதான்,பின்பு தளபதியின் சுந்தரி கண்ணால் ஒரு சேதியில்,

”மாதங்களும் வாரம் ஆகும்
நானும் நீயும் கூடினால்
வாரங்களும் மாதம் ஆகும்
பாதை மாறி ஓடினால்”

என்றும், காதல் தேசத்தின் எனைக் காணவில்லையே நேற்றோடு பாடலில்,

"நிமிஷங்கள் ஒவ்வொன்றும் வருஷங்கள் ஆகும்
நீ என்னை நீங்கிச் சென்றாலே,
வருஷங்கள் ஒவ்வொன்றும் நிமிஷங்கள் ஆகும்
நீ எந்தன் பக்கம் நின்றாலே"

என்றும் வெளிப்படுத்தியிருப்பார். சிந்தனை ஒன்றென்ற போதிலும் அதை வெவ்வேறு சொற்கோர்வையில் பின்னி ரசிக்க வைப்பத்தில் வாலிக்கு நிகர் வாலியே.

அதே போல பாடல் வரிகளில் இடம்பெறும் சொற்களுக்கு என்ன பொருள் என்று அதிகமாய் தேட வைத்தவர் வாலிதான். எனக்கு சட்டென்று நினைவிற்கு வருகிற சொல் ’புன்னை வனம்’,

”புன்ன வனத்தினிலே பேடைக் குயில் கூவயிலே”

"புன்னை வனத்துக் குயிலே நீ

என்னை நினைத்து இசைப் பாடு"

”இந்த பூவுக்கொரு அரசன் பூவரசன்

அடி புன்னைவனக் குயிலே”

என்று அவரின் பாடல்களின் மூலமாகத்தான் புன்னை மரங்களைப் பற்றியும், சங்க இலங்கியங்களில் கபிலரின் குறிஞ்சிப் பாட்டில் இடம் பெற்ற பூக்களில் புன்னையும் ஒன்று என்பதுபோல தகவல்களையும் அறிந்து கொண்டேன். இதே சொல்லை இளையராஜா,” கண்ணம்மா காதலெனும் கவிதை சொல்லடி பாட்டில் “புன்னை வனத் தோப்போரம் உன்னை நினைந்து” என்று வண்ண வண்ண பூக்களிலும், பிறைசூடன்,” புன்னை வன பூங்குயிலே” என்று செவ்வந்தியிலும் எழுதியிருக்கிறார்கள், எனினும் வாலியின் வரிகளில்தான் புன்னை எனக்கு அறிமுகமானது. அதே போல மணிவாசல்,மணிக்கதவு என இன்னும்கூட நிறைய சொற்கள் அவருடைய பாடல்களில் மட்டும் காணக் கிடைக்கும்.

சில்லுன்னு ஒரு காதல் படம் வெளிவந்த நேரத்தில், “முன்பே வா ” பாடலின் பல்லவி குறித்து சக பாடலாசிரியர்களே வியந்து பேசியிருந்தார்கள். பா.விஜய் ஒரு பேட்டியில் சொல்லியிருந்தார், ”இத்தனை வருடம் எத்தனையோ பாடல்களையும், பாடலாசிரியர்களையும் இந்தத் திரையுலகம் கண்டிருந்தும் இந்த ”முன்பே வா” யாருக்கேனும் தோணுச்சா,அவருக்குத்தான் இப்படியெல்லாம் தோன்றும்” என்று அதிசயத்திருந்தார். 

”ஆர்.வி.உதயகுமார், சிங்கார வேலன் படத்தில்  ’இன்னும் என்னை என்ன செய்ய போகிறாய்’ பாடலிலேயே இந்த வார்த்தையை பயன்படுத்தியிருக்காரே”  என்று அப்போது நினைத்துக்கொண்டேன். பிறகு ஆர்.வி.உதயகுமார் குறித்து எழுதிய ஒரு இடுகையின் தகவல்  திரட்டின்போது ஆர்.வி.உதயகுமார், எஃப்.எம்.ரேடியோ ஒன்றிற்கு அளித்த பேட்டியில் இப்படி சொல்லியிருந்தார்.

”இன்னும் என்னை என்ன செய்யப் போகிறாய் அன்பே அன்பே” என்று முதல் வரியை எழுதிவிட்டு இரண்டாவது வரிக்கு யோசித்துக்கொண்டிருக்கையில் அங்கே வந்த வாலி, ”அன்பேன்னு முடிச்சிருக்கியா அடுத்த வரியில் முன்பே,கின்பேன்னு எதையாவது போட்டு யோசிய்யா” என்று முன்பே என்னும் வார்த்தையை எடுத்துக்கொடுத்தாராம். இதைப் படித்ததும் ‘முன்பே’ முன்பே வந்திருந்தாலும் வாலிதான் அதற்கு சொந்தக்காரர் என்று அறிய வந்தபோது ’அட’ என்றிருந்தது.

இன்னும்கூட என்னால் நான் ரசித்த வாலியை முற்றிலுமாய் வெளிப்படுத்த இயலவில்லை . உணர்வுகளில் கலந்த உறவொன்று நம்மைவிட்டு பிரிகையில் எழும் துக்கத்தை அந்த ஆத்மாவிற்கு மரியாதை செய்யும் விதமாக வெளிப்படுத்த வேண்டும் என்ற விருப்பத்தை எனக்குத் தெரிந்த வகையில்  வெளிப்படுத்தியிருக்கேன். வேறொரு சந்தர்ப்பத்தில் அவரைக் குறித்த இன்னும் இன்னும் எனக்குள் ஊறிக்கிடக்கும் நினைவுகளை சரியாக வெளிப்படுத்த வேண்டும்.

"இறந்தும் இறவாநிலை எதிர் பார்க்கிறேன்" என்று எழுதினார். அவரின் எதிர்பார்ப்பும் அவரை ஏமாற்றவில்லை, அவர் சொன்னபடியெல்லாம் கேட்டு மக்கர் பண்ணாத தமிழைப் போல. 

Monday, July 15, 2013

டைம் பாஸ்-6


வாழ்க்கையில் பல சந்தர்ப்பங்களில் நமக்கு தரப்படும்ஆப்ஷன்கள் பௌலிங்கா?, ஃபீல்டிங்கா? வகையையிலேயே இருக்கின்றன.
# இந்த ஸ்டேட்டஸ் உங்களுக்கு புடிச்சிருக்கா? இல்லை நல்லாயிருக்கா?

சொல்வதெல்லாம் உண்மையில் குந்தியிருக்கும் ஜட்ஜம்மாக்களிடம், 90களின் கவுண்டமணியை எதுனா ஒரு பஞ்சாயத்துக்கு பிராது கொடுக்கச் சொல்லி கற்பனை செய்து பார்த்து திருப்திபட்டுக்கொள்கிறேன்.
#கொண்ட போட்டவளுக்கெல்லாம் நான் தீர்ப்பு சொல்றதில்ல

மற்றவரை குறைகளோடு நேசி;குறை உன்னிடமே என்றால் கொஞ்சம் யோசி.
# ஆகையினால எல்லோரும் என்னை நேசிங்க.

எம்பொண்டாட்டிக்கு இத்தனை வகை சட்னி வைக்க தெரியுங்கறதே இன்னிக்குத்தான் தெரியும்.
#மச்சான் வந்திருக்கான்.


பகல் தூக்கம், அன்றைய மீதியை நரகமாக்கும்.
#ஆனா தூங்கும்போது சொர்க்கம்யா.

சிறைதான் என்றாலும் இருந்துவிட்டுப் போகட்டும் சிறகுகள். 
# டேய் சத்தியமா புரியலடா

வயிறு சரியில்லையென்று மணத்தக்காளி சாம்பார் வச்சு கொடுத்தாய்ங்க. அதைப் பார்ததிலிருந்து மனசு சரியில்லை.
#என் கடன் அசைவம் சாப்பிட்டுக் கிடப்பதே

முகத்துல மொளச்சா முகமுடின்னுதானே சொல்லணும், அப்புறம் ஏண்ணே தாடிங்கிறாய்ங்க.
#மாத்தி யோசி என்ற பதத்திற்கான விதையை அனாயசமாய் தூவிய கேரக்டர். 


” டேய் மச்சி நீ எப்பயும் போகாத ஊருக்கே வழி சொல்ற”
“ங்கொய்யால போகாத ஊரு என்ன, போகாத நாட்டுக்கே வழி சொல்லுவேன்..” 
# கூகிள் மேப்ஸ்

நாம் சென்ற பாதையில் இதோ போய்க்கொண்டிருக்கிறேன்,சில கணங்களில் நானும்
சில கணங்களில் நாமுமாய்.

#அப்படியே போய்க்கொண்டே இரு,திரும்ப வந்துறாத

எதிர்பார்ப்புகள் இல்லாமல் வாழ பழகுதல் என்பதுதான் இப்போதைய எனது எதிர்பார்ப்பு.
#இதுக்கு பேருதான்  விசு’வாசம்

எந்த சொல்லிற்குள்ளும்  புதைந்திருக்கும்  என்பதால் கோபமும்கூட ஒரு  கன்னிவெடிதான்.
#வாயை வச்சுகிட்டு சும்மா இல்லாம எங்கேயோ போய் வாங்கி கட்டிகிட்டு வந்து இங்க தத்துவம் சொல்லிகிட்டு இருக்கான்.

டைம் பாஸ்-5

கூகிள் பிளஸில் கிறுக்கியவற்றின் தொகுப்பு

நாவை அடக்க, நானை அடக்கு.
#சொல்லிட்டாருப்பா சாக்ரடீசு

”எக்ஸ்கியூஸ் மீ” என்பது ” கொஞ்சம் நகர்ந்துக்கோங்க ” என்கிற அர்த்தத்திலேயே பெரும்பாலும் சொல்லப்படுகிறது.
#அவதானிப்பு

நெருக்கடிகளில் எண்ணத்தைப் பேசாமல் என்னத்தையாவது பேசித் தொலைக்கும் இந்த பொல்லாத நாக்கு.
#  நீ வாயைத் தொறந்தாலே நெருக்கடிதானடா

தெரியாமல் செய்துவிட்ட தவறுக்கான நியாயத் தேடல்களில் தெரிந்தே பிறக்கிறது மற்றொரு தவறு.
# தெரியாம கிளிக்கி இங்க வந்தது தப்புத்தான் .

ஹோட்டல் மெனு கார்டில் , மாதத்தின் ஆரம்பத்தில் ஐட்டங்களை பார்த்தும், மாதக் கடைசியில் விலையைப் பார்த்தும் ஆர்டர் செய்வதை வழக்கமாக கொண்டவனென்றால் நீயும் என் நண்பனே.
#இப்படி நல்லதா பேசிப் பழகு

கேபிள் கனெக்‌ஷன்,செய்தித் தாள் ,பால் பாக்கெட் மாதிரி இப்போ எங்க வீட்டில் மாதச் செலவுகளில் இடம் பிடித்திருக்கும் புது வரவு(செலவு) ரிமோட் கண்ட்ரோல், டேட்டா கார்ட் மற்றும் செல் போன் பேட்டரி.
வாலு வாழும் வீடு

காட்டிலே காயும் நிலவை கண்டு கொள்ள யாருமில்லை இந்த வரியை கேட்கும்போதெல்லாம் தூர்தர்ஷன் நினைவும் கூடவே வந்துவிடுகிறது.
#எப்புடி இருந்த நீ இப்படி ஆயிட்ட

பழி வாங்க காத்திருக்கும் தருணங்கள் உன்னை பழிவாங்கும்.
# என்னை பழி வாங்கினாலும் பரவாயில்லடா கையில என்னைகாவது மாட்டாமயா போயிடுவ.

தமிழ் தொலைக்காட்சி சீரியல்களில் நிறைமாத கர்ப்பிணிகளாக சிலர் வருட கணக்கில் வலம் வருகிறார்கள்.
#நிறைய மாத கர்ப்பிணிகள்

”அதுல பாருங்க”
 #வி.கே.ராமசாமியோடு வழக்கொழிந்து போய்விட்ட வசனம்.

தப்பை என்னைக்காவது  தட்டி கேட்டுறுக்கியா?
#கேட்டிறுக்கியாவா? தப்பை தட்டி கேக்கும்போது வர்ர அந்த டண்டனக்கு டனக்கு னக்கு என்னா ரிதம்யா, சூப்பரா இருக்கும்.


தன்னை வெல்லுதல் என்பது கடினமான காரியமாம்.
bubble buster கேமில் நேற்றைய எனது ஸ்கோரை இன்று நானே சர்வ சாதாரணமாய் வென்றேன் அப்படி ஒண்ணும் கஷ்டாமா இல்லையே.
#லூசு எதை எதோட கோக்குது பாரு.

கல்யாணங்கள் சொர்க்கத்தில் நிச்சயிக்கப்படுகின்றன..
#ஆமாமா, நிச்சயிக்கப்படும்போது சொர்க்கமாத்தான் தெரியும்.


அற்பனுக்கு வாழ்வு வந்தால் அர்த்த ராத்திரியில் குடை பிடிப்பான்.
#ரைட்டு, அர்த்த ராத்திரியில் மழை பெய்தால் குடை பிடிப்பவனெல்லாம் வாழ்வு வந்தவன் என எடுத்துக்கலாமா?

ஸ்ரீதேவி,கஸ்தூரி என பாட்டிகளை வைத்து விளம்பரங்கள் எடுப்பவர்கள் மோகன்லால் ரசிகர்களாக இருக்க வேண்டும் என்று அவதானிக்கிறேன்.
#ஆண்ட்டி ஹிரோ

மனக்கடலில் மட்டும் அலைகளின் சீற்றம் ஆழத்தில்தான் அதிகமாய்.
#ஆழக் கடலில் தேடிய தத்துவ முத்து

ரயில்வே ஸ்டேஷன்களில் ”காப்பி காப்பி” என்று கூவி, ’இது காஃபியின் காப்பியேயன்றி  ஒரிஜினல் அல்ல’ என்று விற்பவர்களே உங்களுக்கு சூசகமாக  உணர்த்திவிடுகிறார்கள்.
# இனி காஃபி சரியில்லை என்று புலம்புவதை விடுத்து காப்பியை காப்பியா குடிக்கணும் சரியா?

நாளும் ஒரு நான்.
#ம்க்கும் நாளும் ஒரு நீயா? நீ, நேரத்துக்கு ஒரு நீ.

முரண் படுதல் மற்றவரிடத்து எனும் போது இயல்பாய் ; நம்மிலிருந்தே எனும் போது அவஸ்தை.
#ஆமாமா அவஸ்தையோ அவஸ்தை இனி இங்கே வருவேன்

Friday, May 17, 2013

இளையராஜாவின் இசையில் சுசீலா

என்னுடைய ஆல்டைம் ஃபேவரைட் பின்னணி பாடகி சித்ரா. குறிப்பாய் ”பட்டாச சுட்டு சுட்டு போடட்டுமா”, ”மலரே பேசு மௌன மொழி”,”சின்னக்குயில் பாடும் பாட்டு கேட்குதா”  போன்ற அவரது ஆரம்ப கால பாடல்களில் இருந்த அந்த குழந்தைத் தனமான உச்சரிப்பின் மீது பெரிய மயக்கம் உண்டு. 

அவரைவிடுத்து மற்ற பாடகிகளை அவர்கள் பாடியிருக்கும் எல்லா பாடல்களிலும் நான் ரசித்தது இல்லை . அதே நேரத்தில் சில பாடல்கள் இவர்களைத் தவிர வேறு யாரும் இத்தனை சிறப்பாய் பாடியிருக்க முடியாது என்றும் அல்லது அந்த பாடலை வேறு குரலில் யோசிக்கவே வேண்டியதில்லை என்கிற மாதிரியும் தோன்றும். உதாரணமாய் சொர்ணலதாவின் என்னுள்ளே என்னுள்ளேவையோ, ஜானகியின் ராசாவே ஒன்ன நம்பியையோ ,உமாரமணனின் மஞ்சள் வெய்யில் மாலையிட்ட பூவேவையோ,வாணி ஜெயராமின் என்னுள்ளில் எங்கோவையோ இன்னொரு குரலில் என்னால் யோசிக்க முடியாது.

இளையராஜா பீக்கில் வந்ததும் எம்.எஸ்.வி காலத்தில் தனியாவர்த்தனம் செய்து கொண்டிருந்த சுசீலாவிற்கு கிள்ளியும், ஜானகிக்கு அள்ளியும் வழங்க ஆரம்பித்ததில் பின்னணி பாடுவதில் முன்னணிக்கு வந்தார் ஜானகி . அள்ளி வழங்கியதாலோ என்னவோ ஜானகி பாடிய சில பாடல்கள் அவருடைய குரலுக்கு அத்தனை பொருத்தமில்லையோ என்ற எண்ணம் எனக்கு உண்டு. 

ஜானகியின் குரல் குழந்தையாய்,குமரியாய்,கிழவியாய் கொஞ்சி,கெஞ்சி,சிணுங்கி என ஜாலம் செய்து  எக்ஸ்பிரஷனில் ஸ்கோர் செய்துவிடும் எனினும் சில பாடல்களில் ஒரே பாடலிலேயே இரண்டு கதாபாத்திரத்திற்கு பாடுவது போல வேறுபட்டு கேட்கவும் செய்யும். ஜானகி பாடிய சில பாடல்களை வேறு யாராவது பாடியிருக்கலாமோ என்கிற எண்ணத்தை உண்டு பண்ணவும் செய்திருக்கிறது. மாறாக வெகு சொற்பமான எண்ணிக்கையிலான பாடல்களையே ராஜாவிற்கு சுசீலா பாடியிருந்தாலும் அந்த பாடல்கள் அனைத்திற்குமே மாற்றாய் வேறொரு குரலை யோசிக்க முடியாதபடியாய் இருக்கும். சுசீலாவின் குரல் ஜானகியின் குரலினைப்போல எக்ஸ்பிரஷன்ஸில் ஜாலங்கள் காட்டாவிட்டாலும் குரலினிமை என்கிற தன்மையில் அடித்து செல்லும். போலவே சில வார்த்தைகளை அவர் உச்சரிக்கும் தொனிகூட வசிகரமாய் இருக்கும். அப்படி ராஜாவிடமிருந்து கிடைத்த வாய்ப்புகளில் சிக்ஸர் அடித்த சுசீலாவின் பாடல்கள் சில youtube இணைப்புடன்.

காலைத் தென்றல் பாடி வரும் :

கற்பூர பொம்மையொன்று:

மனதிலே ஒரு பாட்டு மழை வரும் அதை கேட்டு:

காளிதாசன் கண்ணதாசன் கவிதை நீ:

பேசக்கூடாது வெறும் பேச்சில் சுகம்:

சோலை புஷ்பங்களே:

சிந்திய வெண்மணி சிப்பியில் முத்தாச்சு:

மயங்கினேன் சொல்லத் தயங்கினேன்:

அரும்பாகி மொட்டாகி பூவாகி:

தில் தில் தில் மனதில்:

முத்துமணி மால:

Tuesday, April 9, 2013

வண்டல் மண் கதைகள்-6

ஆலக்காட்டுக்கு எப்படியாலங்க போகணும்?” குரலைக்கேட்டு தனது டீக்கடை கல்லாவில் உட்கார்ந்திருந்த கோனார், படிச்சிக்கிட்டு இருந்த தினத்தந்தியிலிருந்து தலையை நிமித்தாம, மூக்குக் கண்ணாடிக்கும் புருவத்துக்கும் இடையில பார்வையை மட்டும் நிமுத்திப் பார்த்தார்.

வெள்ளையுஞ் சொள்ளையுமாக ஸ்ப்ளண்டர் ப்ளஸ்ல உட்கார்ந்தபடி கோனாரின் பதிலை எதிர்பார்த்துக்கிட்டு நின்னவனுக்கு ஒரு முப்பத்தஞ்சு வயசிருக்கும்.

“ஆலக்காட்டுக்கு வழி” என்று மீண்டும் ஆரம்பித்தவனுக்கு, “ஆலக்காட்டுக்கா, இந்தா இப்படியே ஆத்துக் கரையிலேயே போனியள்னா ரெண்டாவது பாலத்தோட தெக்கால திரும்பிக்கிருங்க” என்ற கோனார்,தொடர்ந்து “அந்தா அங்ன பஸ்டாப்ல கால்ல கட்டு போட்டுக்கிட்டு ஒக்காந்திருக்காரு பாருங்க, அவரு ஆலக்காடுதான், பாவம் ரொம்ப நேரமா பஸ்ஸுக்கு ஒக்காந்திருக்காரு, முடிஞ்சா அவரையும் ஏத்திக்கிட்டு போறியளா?” என்று நிழற்குடையில் உட்கார்ந்திருந்த சிவலிங்கத்தை காட்டிவிட்டார்.

“அதுக்கென்ன ஏத்திக்கிட்டாப் போச்சு” என்றவன் நன்றிங்கங்கிற மாதிரி கோனாரைப் பார்த்து தலையாட்டிவிட்டு வண்டியை பஸ் ஸ்டாப்பை நோக்கி விட்டான்.

நிழற்குடை கட்டையில் கால் ரெண்டையும் மடக்கி குத்துக்காலிட்டு ஐயப்பஞ்சாமி கணக்கா உட்கார்ந்தபடிக்கு பஸ் வராத எரிச்சல் உள்ளேயும், கொளுத்தியெடுக்கும் வெயில் வெளியேயும் சேர்ந்து அனத்தியதை, கையில் வைத்திருந்த குத்தாலத் துண்டைக் கொண்டு விசிறி விரட்டிக்கொண்டிருந்த சிவலிங்கம், ”ஆலக்காட்டுக்குத்தான போறிய? ஏறிக்கங்க” என்று யாரோ முன்ன பின்ன தெரியாதவன் சொன்னதைக் கேட்டதும் , விசுறுவதை நிறுத்தி, குத்துக்காலை பட்டுன்னு தொங்கவிட்டு, அறிக்காத தலையை சொறிந்துமென மாறி, ”ஆமா, ஆலக்காட்டுக்குத்தான் போகணும், ஆனா தம்பி யாருன்னு புடிபடலியே” என்று வழிசலாய் சிரிச்சுக்கிட்டு இருக்கையிலேயே, ”ஆலகாட்டாரேய்ய்ய்ய்” என்ற கோனாரின் குரல் வரவும், திரும்பினான்.

தினத்தந்திக்குள்ள விரலை வச்சபடிக்கு கையை ஆட்டி ஆட்டி ”நாந்தான் சொன்னேன், ஏறிக்கங்க” ங்கிற மாதிரி சைகை செய்ததை புரிஞ்சிக்கிட்ட சிவலிங்கம், தலையை ஆட்டிக்கிட்டே இன்னும் பெரிசா வழிஞ்சபடி, வண்டியில் ஏறிக்கொண்டு, ”வரட்டுமா” ங்கிற மாதிரி பதில் சைகை காட்டினான்.

சட்டுன்னு தினத்தந்திக்கு பார்வையைத் திருப்பிய கோனார், வண்டியில ஏறிய சிவலிங்கத்திடமிருந்து நினைப்பைத் திருப்ப கொஞ்ச நேரம் பிடிச்சிச்சுங்கிறது, அவர் மொகத்தில தேங்கிக் கிடந்த சிரிப்பை வச்சே கண்டுக்க முடிஞ்சிது. மனசப் பய மனசு சின்னதா யாருக்கும் ஒரு ஒத்தாசை பண்ணாலும் என்னாமா பூரிச்சுப் போவுது.

”என்னா கால்ல கட்டு?” ஸ்பெளண்டர்காரன்தான் ஆரம்பிச்சான்.

“அதுவாப்பா, நாலு நாளைக்கி முந்தி எள்ளுக்கா அறிக்கையிலெ கட்டை குத்திப்புடிச்சு, ஓத்திரியம் தாங்காய்க்கல, அதான் ஓபில காட்டி மருந்து வச்சிக்கிட்டு வாறேன்” என்ற சிவலிங்கம்,”வெகு நேரமா குந்தியிருக்கேன் உள்ள போன பஸ்ஸு இன்னும் திரும்பல, சீர் கெட்டு பொயித்துதான்னு தெரியல, கால் சரியாயிருந்தாவா இப்படி குந்தியிருக்கேன், இந்நேரம் முனியங்கோயிலோட ஒத்தயடி பாதைய புடிச்சு வீட்டுக்கு போயி பழைய ஆளாயிருப்பேன்” என்றான்.

“சமையல் கான்ராக்டரு செல்லத்துரை இருக்காரே அவர தெரியுமா?”

“ஆமா சொல்லுங்க , அவ்வொ வீட்டுக்கிட்டதான் நம்ம வீடு, தொரய பாக்கத்தான் போறியளா?”

“ஆமாமா, நமக்கு ஊரு செவவிடுதி , இதுக்கு முந்தி ஒங்க ஊருக்கு வந்ததில்ல,ஆனா சமையல்காரர் நம்ம ஊருக்கு வந்து போவாரு, அப்புடி பழக்கம்” என்று நிறுத்திக்கொண்டான் ஸ்பெளெண்டர்.

எதுக்காகப் பாக்க போறான் என்று சொல்லுவான்னு எதிர்பார்த்த சிவலிங்கத்துக்கு மேற்கொண்டு ஒண்ணுஞ் சொல்லாம வண்டிய ஓட்டிக்கிட்டு போய்க்கிட்டு இருந்தவனின் செயல் கொஞ்சம் ஏமாத்தத்தை தந்துச்சு.

கொஞ்ச நேரம் கம்முன்னு வந்த சிவலிங்கம், “வீட்ல கல்யாணம் காச்சியா இருக்கும், சமையலுக்கு ஆடரு கொடுக்க போறிய போலருக்கு?” என்று மறுபடியும் ஆரம்பிச்சான். தனக்கு சம்பந்தமில்லாத விஷயந்தான்னாலும் மனுசப்பய மனசாச்சே, சும்மா இருக்க விடுமா,அதான் ஒரு கொக்கியைப் போட்டான்.

“கல்யாண விசியந்தான் , ஆனா சமையலுக்கு ஆடரு கொடுக்கப் போவல, வேற ஒரு விசியமாப் போறேன் ” என்று மறுபடியும் சிவலிங்கத்தின் ஆர்வத்தைத் தூண்டிவிட்டு கப்சிப்புன்னு வண்டியை ஓட்டிக்கிட்டு போனான்.

”சரி, இதுக்கு மேலயும் நோண்டிக் கேட்டா அசிங்கமா போயிரும்” என்று நினைத்த சிவலிங்கம், ”அவனா சொன்னா கேட்டுக்குவோம்”ங்கிற மாதிரி மேற்கொண்டு பேசாமல் வந்தான்.

சிவலிங்கத்தின் நெனப்பு சரியாவே இருந்துச்சு, “செல்லக்கோட்டைக்காரரு சுந்தரம்னு , ஒங்கூர்ல பொண்ணு எடுத்தவரு, அங்கய பொண்ணோட காணியா இருக்காராம்ல, அவரு வீடு எங்ன இருக்கு?” என்று மீண்டும் ஆரம்பித்தான் ஸ்ப்ளெண்டர்.

“ஆமாமா, வடக்கி வீட்டு சுந்தரம், நம்ம வீட்டுக்கு பத்து வீடு தள்ளிதான் அவ்வொ வீடு. சொல்லுங்க தெரியும்”

“எப்புடி குடும்பம்”

என்ன திடீன்னு வடக்கி வீட்டப் பத்தி விசாரிக்கிறான் என்று யோசிச்சிக்கிட்டே,”ம்ம் நல்ல குடும்பம்தான், பத்து பாஞ்சு மா நெலம் இருக்கு, முந்தி கொஞ்சம் நொடிச்சி போயிருந்தவோ, இப்போ சுந்தரம் தலப்பட்டு கொஞ்சம் காசு பணம்னு பச புடிப்பாத்தான் இருக்கவோ” என்று சொன்னவன், “ஆமா,எதுக்கு இப்போ அவ்வூட்ட பத்தி விசாரிக்கிறிய , கல்யாண விசியும்னு வேற சொன்னிய , அவ்வூட்டு பொண்ண கேக்கப் போறியளோ?” என்று விசியத்தை நெருங்கிவிட்ட திருப்தியில் கேட்டான்.

“அதான் பட்டுன்னு புரிஞ்சிக்கிட்டியளே, நம்ம தம்பி ஒருத்தனுக்கு பொண்ணு பாத்துக்கிட்டு இருக்கோம், பாப்பாநாட்டு புரோக்கர்கிட்ட அந்தப் பொண்ணோட சாதகம் இருந்திச்சு, அதான் காண்ட்ராக்டர் செல்லத்துரைக்கிட்ட சாரிச்சிட்டு போவலாம்னு வந்தேன்”.

“அப்படி சொல்லுங்க சேதிய ” என்ற சிவலிங்கம் , ”நல்ல்ல்...ல குடும்பம்தான்” என்று இழுத்து, ”எதுக்கும் தொரைக்கிட்டயும் கொஞ்சம் நல்லா சாரிச்சுகிடுங்க” என்று ஒரு மாதிரி சொன்னான்.

“என்னங்க இன்னமுட்டும் நல்ல குடும்பம்னிய, இப்ப என்னமோ இழுத்தாப்ல பேசுறிய”

“அப்படியில்ல, கல்யாண விசியம் எதுக்கும் ஒண்ணுக்கு ரெண்டு தடவ சாரிச்சிக்கிறது நல்லதுன்னு சொல்றேன்” என்ற சிவலிங்கத்தின் பதிலில் ஏதோ விசியம் இருப்பதை புரிஞ்சிக்கிட்ட ஸ்ப்ளெண்டர்,

“இங்கருங்க ஏதோ இக்கு வச்சே பேசுறிய, என்னான்னு சொல்லுங்க, நீங்களே சொல்றிய நல்லா சாரிச்சுகிடுங்கன்னு,தெரிஞ்சத சொல்லலாம்ல” என்று சேதியில கவனமா இருந்தவன் ரோட்டில் இருந்த சின்னக் குழியை கவனிக்காம வண்டியை விட்டுவிட்டான்.

வண்டி குழியில் இறங்கி ஏறி தடுமாறியதில், ”என்னத்த ரோடு போடுறாய்ங்க, ஒரு மழைக்கு தாங்கலைங்கிது, ரோட்ல ஆரம்பிச்சு புள்ளய படிக்கிற பள்ளியோடம் வரைக்கும் இந்த பவுசுலதான் இருக்கு” என்று பேச்சை மாத்தினான் கேட்டக் கேள்விக்கு புடிகொடுக்காத சிவலிங்கம்.

இந்த முறை ஸ்ப்ளெண்டருக்கு இருப்புக் கொள்ளவில்லை, “ அது இருக்கட்டும்ங்க, இப்ப நம்ம பேசிட்டு இருந்த விசியத்துக்கு வாங்க, எதுவானாலும் பட்டுன்னு தேங்கா ஒடச்ச மாதிரி சொல்லுங்க” என்று சொன்னவன் வண்டியை அருகில் இருந்த நாவ மரத்துக்கிட்ட நிறுத்தினான்.

”வசதி வாய்ப்புல கூட கொறச்சு இருந்தாலும் பிரச்சனை இல்லை, கௌரவமான குடும்பமா இருந்தாப் போதும், வேற பெருசால்லாம் எதிர்பார்ப்பு இல்லங்க, பொண்ணு கிடைக்கிறது ரொம்பக் கடுசா இருக்குல்ல அதான்” என்றவன், பாக்கெட்டிலிருந்து கோல்ட் ஃப்ளேக் ஒண்ணை எடுத்து பத்த வச்சபடி, ”பொண்ணு எதுவும் அப்படி இப்படி ” என்று இழுத்தான்,

“சே சே பொண்ணு மேலயெல்லாம் கொற சொல்ல வாய்க்காது, ஆனா..” என்ற ஏதோ சொல்ல வாயெடுத்த சிவலிங்கம், பட்டுன்னு சுதாரிச்சு “ யார பத்தியும் நாம ஒண்ணு சொன்னம்னு இருக்கப்டாது, என்னைய கேக்காதிய, அதான் தொரைய பாக்கப் போறியல்ல அங்க கேட்டுக்கிருங்க" என்று மடையடச்சு பேசினான்.

"சரிங்க என்னத்தையோ மறைக்கிறிய, நல்ல விசியமா இருந்தாத்தான் சொல்லியிருப்பியளே, அப்புறம் என்னத்த நான் அங்க வந்து சாரிக்கிறது" என்றபடி புகையிற சிகரெட்டை கையில் வச்சபடிக்கே கட்டைவிரலால் நெத்தி வேர்வையை வழிச்சு சுண்டிவிட்டவனின் பார்வை கீழே எதுவுமே இல்லாத கட்டாந்தரையில் குத்தியிருந்தது, அவன் தீவிரமான யோசனையில் இருப்பதைக் காட்டியது.

”எங்கே இவன் இங்கிட்டாலயே திரும்பிருவானோ, வெயிலு வேற உச்சிக்கு வந்திடுச்சு” என்று தனக்குள்ளயே குழம்பிக்கிட்டு இருந்த சிவலிங்கம், " அடியெடுத்து வைக்கறதே பெருஞ் செரமமா இருக்கு" என்று தன்னை இப்படியே விட்டுவிட்டு போய்விடக்கூடாதேங்கிற கவலையில் கொஞ்சம் கூடுதலாய் வலியை வெளிக்காட்டியபடியே கிழே மறுபடியும் ஐயப்பஞ்சாமியாய் உட்கார்ந்தான்.

ஏதோ ஒரு முடிவு எடுத்தவனாய் அவசர அவசரமாய் மிச்ச சிகரெட்டையும் இழுத்துவிட்டு சிகரெட் துண்டை கீழேப் போட்டு, அட்டப் பூச்சியை நசுக்குவது மாதிரி காலை வழட்டி நெருப்பை அணைச்சவன், கட்டியிருந்த வேட்டியை கொஞ்சம் லூஸாக்கி மறுபடியும் இறுக்கிக் கட்டிக்கிட்டு, "சரி ஏந்திரிங்க, வந்தது வந்துட்டேன் ஒங்கள ஊர்ல விட்டுட்டு கெளம்பறேன்" என்றதும் அவசர அவசரமாய் வண்டியில் ஏறிக்கிட்டான் சிவலிங்கம்.

கரடி பத்தை பாலம் வர்ர வரைக்கும் எதுவுமே பேசிக்கல ரெண்டு பேரும். இந்த இடம் வேண்டாம்னு முடிவு பண்ணிட்டாலும் அட அப்படி என்னத்தைத்தான் இந்த ஆளு மறைக்கிறாங்கிறதை தெரிஞ்சிக்க ஸ்ப்ளெண்டருக்கு ஆர்வம் வந்திடுச்சு. அவன் மட்டும் என்ன வானத்திலேர்ந்தா குதிச்சான், மனுஷப்பயதானே,

“இந்த பாலத்திலதான் திரும்பணுமா?”என்று ஸ்ப்ளெண்டர்தான் மறுபடியும் ஆரம்பிச்சான்.

”இல்ல இல்ல, அடுத்த பாலம், நீங்க அங்னயே விட்டுட்டியள்னாகூட போதும்”

"இந்த இடம் சரிப்படாதுன்னு பட்டுடுச்சுங்க, இருந்தாலும் என்னா ஏதுன்னு தெரியாம போறோமேன்னுதான் கொஞ்சம் இதுவா இருக்கு" என்று ஒரு கொக்கியைப் போட்டான்.

தன்னைக் கொண்டு வந்து விடுவதற்காக இவ்வளவு தூரம் மெனக்கெட்டு வரானே ,விசியத்தை சொல்லிடுவோமா என்று கொஞ்சம் குழம்பியபடியே வந்துக்கிட்டு இருந்த சிவலிங்கத்துக்கு, அவன் மறுபடியும் இப்படிக் கேட்டதும் வடி மடையை வெட்டிவிட்ட மாதிரி கடகடன்னு சொல்ல ஆரம்பிச்சிட்டான்.

“தம்பி , நீங்க பாக்கப் போற பொண்ணோட அம்மா கொஞ்சம் அப்படி இப்படி, பாஞ்சு இருவது வருஷத்துக்கு முந்தி கண்ணுச்சாமின்னு மேக்கித்தியான் ஒருத்தன் அவ்வொ வீட்டுல இருந்து வேல வெட்டி செஞ்சிக்கிட்டு இருந்தான், அவனோட பழக்கமாயி பொறந்த புள்ளதான் நீங்க பாக்கப்போற பொண்ணு. இந்த விசியம் வெளில தெரியறதுக்கு முந்தி, நம்ம சாதிக்கார பயலான தாய்,தாப்பன் இல்லாத இந்த சுந்தரத்துக்கு சொத்த எழுதிவச்சு, நாலாம் பேருக்குத் தெரியாம மூடி மறச்சி கல்யாணம் பண்ணிவச்சிட்டாய்ங்க, ஊருக்குள்ள அரச பொரசலா ஒண்ணு ரெண்டு பேருக்குத்தான் இந்த விசியம் தெரியும்” என்றவனுக்கு சட்டுன்னு ,தான் சொன்ன விசியத்தை எங்க ஸ்ப்ளெண்டர் யாருகிட்டயும் சொல்லிப்புடுவானோங்கிற பயம் வந்திடுச்சு. தனக்கு தேவையில்லாத விசயங்கள்ல தலையைக் கொடுத்துப்புட்டு பிறகு யோசிக்கிறதுதானே மனசப்பய குணம். இப்போ சொன்னதை யாருகிட்டயும் சொல்லிடக்கூடாதேங்கிற எண்ணத்தில் ஸ்ப்ளெண்டரை குளுமைப் படுத்த ”உங்களப் பாத்தா பெரிய இடத்து புள்ள மாதிரி தெரியிது ,அதான் உங்க நல்லதுக்குத்தான் சொல்றேன்” என்று சொல்லி முடிக்கவும், ஆலக்காட்டு பாலம் வரவும் சரியா இருந்துச்சு.

“தம்பி இப்படியே நிப்பாட்டிக்கிருங்க, நான் எறங்கிக்கிறேன்” என்ற சிவலிங்கம், ”உங்களுக்குள்ளயே வச்சிக்கிடுங்க தம்பி, நான் சொன்னேன்னு தெரிஞ்சா பொல்லாப்பாயிரும்” என்று வெளிறிய முகத்தோட சொன்னான்.

“சே சே, நான் யாருக்கிட்டயும் விட்டுக்கிற மாட்டேன், நல்ல வேளை, விசியத்தை சொன்னிய, சரி பாத்துப் போங்க” என்று சிவலிங்கத்தை இறக்கிவிட்டுவிட்டு ஒரே முறுக்காய் முறுக்கி மின்னல் வேகத்தில் பறந்தான் ஸ்ப்ளெண்டர்.

செட்டியார் கடையில் வெத்தலை சீவல் வாங்கிக்கிட்டு வீட்டுக்கு நடையை கட்டிய சிவலிங்கத்துக்கு, வீட்டுக்கு கொஞ்சம் தள்ளி வந்தப்பவே அவன் பொண்டாட்டி ஒப்பாரி வச்சு அழவுற சத்தம் கேட்டுச்சு, சட்டுன்னு குழப்பமான சிவலிங்கம் நடையை விரட்டி வீட்டைத் தொட்டதும், அவன் பொண்டாட்டி இன்னும் சத்தமாய் ,”ஏங்க, இந்தப் பய வடக்கி வீட்டுக் குட்டிய இழுத்துக்கிட்டு ஓடிட்டானாம்ங்க” என்று வாசலுக்கு ஓடி வந்தாள் தலைவிரி கோலமாய்.

சிவலிங்கம் சுத்தி முத்தியும் பாத்தான்,பக்கத்து வீட்டு பரமசிவம் வைக்கோல் புடுங்குற மாதிரி, கண்ணை வைக்கோல் போர்லயும் கருத்தை சிவலிங்கத்து வீட்லயுமா வச்சி நின்னுக்கிட்டு இருந்தான். தெரு பைப்புல தண்ணி புடிச்சிக்கிட்டு இருந்த காரவீட்டு சரசு, நீர் கடுப்புல சொட்டு மூத்திரம் வர கணக்குல பைப்ப கொஞ்சமா திருப்பி வச்சிக்கிட்டு தண்ணி புடிக்கிற மாதிரி நின்னுக்கிட்டிருந்தா. பாலக்கட்டையில ஒக்காந்துக்கிட்டு வேற என்னத்தையோ பேசிக்கிட்டு இருக்கிற மாதிரி இருந்த இளவட்டப் பயலுக சிவலிங்கத்தைப் பார்த்ததும் ஆர்வமானதை எல்லாம் கவனிச்சவன்,தம் பொண்டாட்டி கன்னத்துல ஓங்கி ஒரு அறையை விட்டு ”இப்ப என்ன எழவா விழுந்திடுச்சுன்னு ஒப்பாரி வக்கிற, மத்த நாயிவொ மாதிரி,கண்ட சாதிக்குள்ளயுமா போயி நொழஞ்சான், சாதிக்காரியோடதான போயிருக்கான்,போயி சோலியப் பாருடி” என்று மிகச் சாதாரணமாய்ச் சொல்லிவிட்டு நெனப்போட பவுசு மூஞ்சில தெரியுங்கிறதையெல்லாம் பொய்யாக்கி எப்பயும்போல வெத்தலைப் பொட்டலத்தைப் பிரிச்சபடி திண்ணையில் உட்கார்ந்தான்.

#வண்டல்_மண்_கதைகள்